വി.വി.ഐ.പി.കളില്‍ വ്യത്യസ്തനായി പ്രതിരോധ മന്ത്രി

പുണെ: വിവാഹ ആഘോഷച്ചടങ്ങില്‍ കേന്ദ്ര പ്രതിരോധ മന്ത്രി മനോഹര്‍ പരീക്കറിനെ കണ്ട് പങ്കെടുക്കാനെത്തിയവര്‍ ശരിക്കും ഞെട്ടി. വി.ഐ.പി.കളില്‍ വ്യത്യസ്തനായ മന്ത്രി വധൂവരന്മാര്‍ക്ക് ആശംസകളര്‍പ്പിക്കാന്‍ നിന്നവരുടെ വരിയില്‍ ഊഴത്തിനായി കാത്തുനിന്നു. വിവാഹത്തിനെത്തിയ കിരണ്‍ ചിട്‌നിസ് എന്ന പെണ്‍കുട്ടി മന്ത്രി ക്യൂവില്‍ നില്‍ക്കുന്ന ചിത്രം ഫേസ്ബുക്കില്‍ പോസ്റ്റ് ചെയ്തു. ഉടന്‍തന്നെ അത് വൈറലാകുകയും ചെയ്തു. ജന്മനാടായ ഗോവയില്‍നിന്നുള്ള മന്ത്രിയെ കിരണ്‍ പെട്ടെന്ന് തിരിച്ചറിഞ്ഞു. മനോഹര്‍ ഭായ് ഒട്ടും മാറിയിട്ടില്ലെന്നും മുഖ്യമന്ത്രി പദത്തില്‍ നിന്ന് കേന്ദ്ര പ്രതിരോധമന്ത്രി പദത്തിലേക്കുള്ള യാത്രയിലും അദ്ദേഹം വിനയം സൂക്ഷിക്കുന്നെന്നും കിരണ്‍ തന്റെ പോസ്റ്റില്‍ രേഖപ്പെടുത്തി.